Andruw Jones ta skucha (1996)

Andruw Jones a sera su wowonan i rekordá. Su kas tabata keda ménos ku 5 kilometer for di e isla su refineria. E tabata sinta warda riba muraya di kas ku su bate den su skochi. Despues e ta tende e zonido firme di su tata su sapatu di trabou. Mener Jones ta yega ku su skoudernan hanchu, kara shushi di e stòf di refineria ku su baki almuerso ta zwai bai bin banda di dje.

“Bo ta kla, kampion?”

Andruw ta smail. “Semper.”

E kurá di famia Jones no tabata un vèlt den forma di diamante. E tabata djis un pida stupi di sker i gainan maron ku tabata kore bai ora Andruw para den posishon di bateo. Mener Jones a bai na rudia pa pone dos krat di lechi boka abou i a kuminsá kalentá ku un bala bieu di beisbòl. E solo di atardi ainda tabata kima i no a tuma hopi tempu pa nan a kuminsá soda.

“Ban tuma un pousa – bai paden i kue dos limonada den kushina.” Nan a kai sinta bou di e sombra di e palu di flamboyan kòrá.

“Bo sa Andruw, mi tabata pensa na trabou. E mashinnan tin ritmo. Despues di 20 aña mi lo mester a traha ku tur mashin na e refineria. Pa míles i míles di ora i kada un tin un zonido úniko. Por ehèmpel, e komprèsor ta zona diferente ora e tin strès. Un pòmp ta zona traka… traka…traka promé ku e kibra. Na trabou mi velosidat ta baha, mi ta sinti ora e drat di skruf di e bout gara i mi ta tende kada parti di e mashin ku ta skùif.

El a lèn su lomba patras, manera ku ta e nubianan e ta wak. “Bo sa, e mashinnan por bisa mi ora algu ta robes. I ami a siña skucha. Bo sa kiko mi ke men?” 

“Mi ta kere,” Andruw a kontestá hungando ku e bala riba su kabes.

Mi tabata pensa ku ta esei ta hasi un ingeniero bon…  i kisas tambe loke ta hasi un hungadó di beisbòl bon.

El a saka un man yen di tapa di bòter ku a pèrdè koló for di su saku di karson.

Andruw a wak tur konfundí. “Bati tapa ta algu pa kurá di skol.”

"Un tiki pasenshi ku mi pa esaki. Ban enfoká riba e tapanan awe – esaki lo saka bo for di bo zona di komodidat. Enfoká riba skucha… skucha e picher, skucha e bate, skucha e ángulo di e tapa pa bo sa unda bo bate tin ku bai.” Mener Jones a bula i a tira un tapa den laira i a swing riba dje ku un bate bieu. E tapa a baila bula bai kai te na otro banda di e stupi di betòn.

“Bunita!” Andruw a grita kontentu, tanten el a piki esaki ku e krat.

Mener Jones a bisa sí ku kabes. “Ta bai pa bo komprondé unda e ta bai, promé ku bo swing. Skucha i komprondé e rantnan di e tapa ku nunka ta pareu. Si nos por siña dominá e tapanan, nos por dominá un bala.”

Un ora largu nan a baila. E mucha hòmber ta kore tras di tapa, tira kabes, hari, e hòmber ta swing pokopoko pa midi tur strike. Grita di legria ora un tapa bira un honron riba e wayanan di kologá paña.Ora ku sodó tabata mua nan shirtnan papa muá i e bientu finalmente tabata baha e kalor, nan a bolbe kai huntu bou di e palu bieu.

Pa un ratu, niun di dos no a bisa nada. “Mi yu, tur hende por bati algu den laira. Pero solamente un kampion sa kon pa skucha.”

Andruw a habri su wowonan. E stadion tabata yen i kada fanátiko di Atlanta Braves tabata wanta nan rosea. Andruw na bate, e tabata skucha… i despues el a swing. Ku 19 aña, Andruw Jones a bira e hungadó di beisbòl di mas hóben ku a yega di dal un honron den Serie Mundial.