Tomasito i e kueba di pirata (1795)

Hopi aña pasá den tempu di pirata i oro skondí, tabatin un mucha hòmber piskadó ku yama Tomasito òf Tomas Chikí. E tabata biba den un hùt na e parti nortwèst di Kòrsou i su trabou tabata pa skama i limpia e piská na e pir Playa Piskadó pa hendenan di e bario. Trabou duru ku pago hopi abou. Tomasito tabata tuma su tempu pa pensa kon e por gana sèn pa kumpra su mes boto. Pa asina e subi laman ku e otro hòmbernan.

Un dia, el a tende un hòmber bieu sin djente ku un barba largu te na su pia ta papia pokopoko ku e piskadónan.

“Bo sa kaminda e palu di mansaliña ta lèn riba e baranka na e parti nort di Playa Kalki na kaminda pa Watamula” e hòmber a kuminsá, “Bo ta haña un pisina te abou den e kueba hundu. I mi ta bisa bo mesun real ku mi ta na bida i ta hala rosea, tin un gran kantidat di oro ku ta pertenesé na e pirata Black Caesar. E oro aki ta den profundidat di e awa ei.”

“Pero kidou,” el a atvertí tanten ku el a bira wak Tomasito lentamente,“Black Caesar tabata un hòmber brutu i e spiritu di e kueba ku nan a fors’é pa vigilá e tesoro, no ta masha kontentu ku intruso.”

Tomasito a pretendé ku e no tabata skucha pero su kurason tabata bati duru di emoshon. E mesun anochi, el a prepará pa un aventura. E tabata sigur ku awe na ocho dia e lo ta den kumpra su mes boto di piskadó.

E la kue un kabuya i un lantera for di e dòk i di einan el a logra yega Watamula kaminda e palu bieu di mansaliña tabata lèn riba e baranka. Einan, manera e piskadó bieu a bisé, el a topa un kueba – hanchu i profundo ku murayanan di piedra ku ta disparsé den skuridat. Olanan tabata kibra i e bientu tabata zona duru manera ta sekretonan misterioso e tabata konta. Sin pensa dos bia, Tomasito a mara su kabuya na un piedra stabil, el a kue tené duru i a kuminsá baha bai den e kamber skondí ku laman mes a krea.

Einan, den e kurason mes, Tomasito a haña e pisina yen di awa, chikí i perfektamente rondó. E pisina tabata bria manera plata líkido. Un brio manera kos ku ta un lus tabata baila den dje. Tomasito a yega serka, su pasonan ta laga un eko duru atras den e anochi silensioso. El a kai na rudia banda di e pisina i a tira bista den e profundidat.

Den promé instante, den e lus di su lantera, el a mira solamente su refleho. Pero despues el a mira algu ta lumbra te den fondo – algu koló di oro. Su rosea a bira mas lihé. Su kurason a bati duru. “E tesoro!” el a bisa ku stèm abou miéntras el a lèn mas serka.

Pero na momentu ku su dedenan a mishi ku e awa, e pisina a kuminsá kambia di forma. E lus a bira mas kla i un figura di spiritu di pirata a sali for di den e awa. Su forma tabata parse neblina pero su spada a mustra kla kla manera ku e tabata pintá ku sanger.

“Abo ku ta buska loke no ta di bo,” e spiritu di kueba di Black Caeser a yora, su bos ta friu manera un choke di ola. “E pisina aki no ta lugá pa mannan mortal. Mi ta e spiritu di bahada i subida di laman, esun ku ta keda ku oro. Bo a stroba mi deskanso i awor abo lo mester drumi.”

Promé ku Tomasito por a kita su man for di e awa friu, e awa a subi bin ariba i tap’é manera un belo ku ta move. E lus di su lantera a baha i el a paga. E mucha hòmber a sak den otro riba e suela friu. E spiritu a kanta un kantika di laman suave asina, miéntras Tomasito a kai den un soño profundo i mágiko.

E bahada i subida di laman tabata sigui, drenta den e pisina i sali bèk. Di e forma aki karga e poder di e spiritu huntu ku nan. Pa hopi aña Tomasito a drumi te den fondo di e kueba. Asta tempu a lubid’é.

Ora ku e magia a kita, Tomasito a lanta for di soño. Su kurpa tabata steif i kansá. Su kabei awor tabata shinishi i tur na krùl. Un barba a krese bai te na su pia. E tabata asina flaku ku kasi su kurpa tabata un skelèt. No a sobra ni un djente mas den su kabes. Loke a sobra di su paña tabata kargá ku piedra presioso chikí manera un mantel di payèt.

Lentamente el a sali bèk for di e kueba. E mundu ku el a mira awor, a kambia. Tabatin kasnan straño trahá rondó di e kueba. Na lugá di kabai den e kayanan, tabatin mònsternan grandi ku kuater tayer. E era di pirata a pasa i niun hende mas tabata papia di oro skondí.
For di e tempu ei, e kueba banda di Watamula a bira konosí komo e kueba di Tomasito. Tomas Chikí a pasa su sobrá añanan di bida na e dòk di Playa Piskadó. Tin biaha e tabata bisa e hendenan deskonosí tokante e spiritu ku ta kuida e pisina i e tesoro ku ainda tabatei ta lumbra den e fondo.